የLedger የግል መረጃ ጥበቃ ፖሊሲ

• መረጃው እንዴትና ለምን እንደሚውል የምንወስነው እኛ ስንሆን፣ ለምሳሌ አካውንትዎን ለማስተዳደር፣ ክፍያ ለመጠየቅ፣ ድጋፍ ለመስጠት፣ አገልግሎቱን ደህንነቱ የተጠበቀ ለማድረግና ሕጋዊ ግዴታዎቻችንን ለመወጣት፣ ለመረጃው ኃላፊነቱ የLedger ነው (የመረጃ «ተቆጣጣሪ»)።
• ንግድ ድርጅትዎ ስለ ደንበኞቹ፣ አቅራቢዎቹና ሠራተኞቹ መረጃ ወደ Ledger ሲያስገባ፣ ለዚያ መረጃ ኃላፊነቱ የንግድ ድርጅትዎ ነው። እኛ መረጃውን የምናስተናግደው አገልግሎቱን ለመስጠት በእርስዎ መመሪያ መሠረት ብቻ ነው (የመረጃ «አቀናባሪ»)። ዝርዝሩ በውሎችና ሁኔታዎቻችን ውስጥ ተገልጿል።
• ደረሰኝ ሲያስመዘግቡ የገቢዎች ሚኒስቴር የደረሰኙን መረጃ ይቀበላል፤ በራሱ ሕጋዊ ሥልጣን መሠረትም ይጠቀምበታል።

• የአካውንትና የመገናኛ መረጃ፦ ስም፣ የሥራ ኢሜይል፣ ስልክ ቁጥር፣ የሥራ መደብ፣ የንግድ ስምና አድራሻ፣ እንዲሁም በአካውንትዎ ውስጥ ያሉ ተጠቃሚዎችና ፈቃዶቻቸው።
• የንግድና የግብር መረጃ፦ የግብር ከፋይ መለያ ቁጥር (TIN)፣ የተ.እ.ታ ምዝገባ፣ የቅርንጫፍ መረጃ፣ የሲስተም ቁጥሮችና ከሚኒስቴሩ ሥርዓት ጋር ለመገናኘት የሚያስፈልጉ ማረጋገጫዎች።
• እርስዎ የሚያስገቡት የንግድ መዝገብ፦ ደረሰኞች፣ ክሬዲትና ዴቢት ኖቶች፣ የደንበኞችና የአቅራቢዎች መረጃ፣ ዕቃዎች፣ ዋጋዎች፣ ግብሮች፣ ክፍያዎችና አባሪ ሰነዶች።
• ቴክኒካዊ መረጃ፦ የIP አድራሻ፣ የብራውዘርና የመሣሪያ ዓይነት፣ የመግቢያና የደህንነት ክስተቶች፣ ቀንና ሰዓት፣ የስህተት መዝገቦችና ከሚኒስቴሩ ሥርዓት የሚመጡ ምላሾች።
• የድጋፍ መረጃ፦ መልእክቶችዎ፣ የጥሪ ማስታወሻዎች ወይም ቅጂዎች፣ አባሪዎችና የግንኙነት ታሪክ።
• የክፍያ መረጃ፦ ፓኬጅዎ፣ ደረሰኞች፣ የክፍያ ማጣቀሻዎችና የግብር መዝገቦች። የክፍያ አገልግሎት ሰጪዎች የክፍያ መረጃን በራሳቸው ፖሊሲ መሠረት ሊሰበስቡ ይችላሉ።

የጤና መረጃ፣ የባዮሜትሪክ መረጃ ወይም የመታወቂያ ሰነዶች አያስፈልጉንም። ለተለየ ሕጋዊ ምክንያት ካልጠየቅን በስተቀር አይላኩልን። የይለፍ ቃልን ወይም ሚስጥራዊ ቁልፍን (private key) በኢሜይል፣ በቴሌግራም ወይም በድጋፍ መልእክት በፍጹም አይላኩ።

• ከእርስዎ፦ ሲያነጋግሩን፣ ማሳያ (demo) ሲይዙ፣ ሲመዘገቡ፣ ፕላትፎርሙን ሲጠቀሙ፣ ድጋፍ ሲጠይቁ ወይም ሲከፍሉ።
• ከአካውንትዎ አስተዳዳሪ፦ ተጠቃሚዎችን ሊፈጥርና ሠራተኞችን ወይም አማካሪዎችን ሊጨምር ይችላል።
• ከገቢዎች ሚኒስቴር ሥርዓት፦ የደረሰኝ ቁጥር (IRN)፣ QR ኮድና የሁኔታ ምላሾችን ይመልሳል።
• ከድረ-ገጻችን፦ በኩኪዎችና በተመሳሳይ ቴክኖሎጂዎች (ክፍል 9ን ይመልከቱ)።
• ከሕዝብ የንግድ ምንጮች ወይም ከጥቆማ፦ በዚህ ጊዜ መረጃዎን ከየት እንዳገኘን እናሳውቅዎታለን።

• አካውንትዎን ለመክፈትና ለማስተዳደር፣ እንዲሁም ንግድዎን ወክለው ለመሥራት ሥልጣን እንዳለዎት ለማረጋገጥ።
• አገልግሎቱን ለመስጠት፦ ደረሰኝ ለመቁረጥ፣ በሚኒስቴሩ ለማስመዝገብ፣ ተ.እ.ታ ለማስላትና ሪፖርቶችን ለማዘጋጀት።
• ድጋፍ ለመስጠትና ችግሮችን ለመፍታት።
• ክፍያ ለመጠየቅና የራሳችንን የሂሳብና የግብር መዝገቦች ለመያዝ።
• አገልግሎቱን ደህንነቱ የተጠበቀ ለማድረግና ያልተገባ አጠቃቀምን ወይም ማጭበርበርን ለመከላከል።
• ሕጋዊ ግዴታዎቻችንን ለመወጣት።
• ስለ Ledger አዳዲስ መረጃዎችን ለመላክ፣ ሕጉ በሚፈቅድበት ወይም እርስዎ በተስማሙበት ጊዜ ብቻ።

እንደ ዓላማው፣ ከእርስዎ ጋር ባለን ውል፣ በሕጋዊ ግዴታዎቻችን፣ ደህንነቱ የተጠበቀ አገልግሎት ለማስኬድ ባለን ሕጋዊ ጥቅም ወይም በእርስዎ ፈቃድ ላይ እንመሠረታለን። በፈቃድዎ ላይ ስንመሠረት ፈቃድዎን በማንኛውም ጊዜ ማንሳት ይችላሉ።

ደረሰኝ ሲቆርጡ Ledger ሕጉ የሚጠይቀውን መረጃ ወደ ገቢዎች ሚኒስቴር ሥርዓት ይልካል፦ የእርስዎን TIN እና የቅርንጫፍ መረጃ፣ አስፈላጊ ሲሆን የገዢውን መረጃ፣ እንዲሁም ዕቃዎቹን፣ መጠኖቹንና ግብሮቹን። ሚኒስቴሩ ይፋዊ ቁጥርና QR ኮድ ይመልሳል፤ እኛም በደረሰኙ ላይ እናሳያቸዋለን።

ደረሰኝ አንዴ ከተመዘገበ ይፋዊ የግብር መዝገብ ይሆናል። የLedger አካውንትዎን መዝጋት ወይም መረጃዎ እንዲሰረዝ መጠየቅ የተመዘገበውን ደረሰኝ አይሰርዘውም። የተመዘገበ ደረሰኝን ለማስተካከል ክሬዲት ኖት፣ ዴቢት ኖት ወይም ይፋዊውን የስረዛ ሂደት ይጠቀሙ።

የግል መረጃንም ሆነ የንግድ መዝገብዎን አንሸጥም። መረጃን የምናጋራው አስፈላጊ ሲሆን ብቻ ነው፦

• ለአካውንትዎ አስተዳዳሪና እርስዎ ለፈቀዷቸው ተጠቃሚዎች፣ እንደ ፈቃዳቸው።
• ደረሰኞችን ሲያስመዘግቡ ለገቢዎች ሚኒስቴር።
• ለአገልግሎት ሰጪዎቻችን (ክፍል 8)፤ በውል መሠረት ለእኛ ይሠራሉ፤ መረጃውንም በወሰንነው ዓላማ ብቻ ይጠቀማሉ።
• እንደ ጠበቆችና ኦዲተሮች ላሉ የሙያ አማካሪዎች፣ መረጃውን በሚስጥር የመጠበቅ ግዴታ አለባቸው።
• ሕጉ ሲያስገድድ ለፍርድ ቤቶች ወይም ለባለሥልጣናት።
• Ledger ቢሸጥ ወይም ከሌላ ድርጅት ጋር ቢዋሐድ ለገዢው ወይም ለተተኪው፣ በተመሳሳይ ጥበቃ። ይህ ቢከሰት እናሳውቅዎታለን።

ያለ ፈቃድዎ ስምዎን፣ አርማዎን ወይም ምስክርነትዎን አንጠቀምም፤ የንግድ መዝገብዎንም አጠቃላይ የሰው ሠራሽ አስተውሎት (AI) ሞዴሎችን ለማሠልጠን አንጠቀምበትም።

የአካውንትዎና የንግድ መዝገብዎ መረጃ የሚቀመጠው በኢትዮጵያ ውስጥ ነው። ይህም በግል መረጃ ጥበቃ አዋጅ ቁጥር 1321/2016 አንቀጽ 22 መሠረት ነው፤ አንቀጹ በኢትዮጵያ የተሰበሰበ የግል መረጃ በኢትዮጵያ ውስጥ ባለ ሰርቨር ወይም የዳታ ማዕከል እንዲቀመጥ ይጠይቃል።

ለድጋፍና ለመገናኛ የምንጠቀምባቸው ሁለት አገልግሎቶች መረጃን ከኢትዮጵያ ውጭ ሊያስተናግዱ ይችላሉ፦

• ቴሌግራም፣ ለድጋፍ ውይይት።
• Zoho፣ ለድጋፍ ሥርዓታችንና ለኢሜይል።

በእነዚህ አገልግሎቶች የምንልከው እርስዎን ለመርዳት የሚያስፈልገውን ብቻ ነው፤ አዋጁ የሚጠይቃቸውን ጥበቃዎችም እንተገብራለን። ካልጠየቅንዎ በስተቀር ደረሰኞችን፣ ማረጋገጫዎችን ወይም ሌሎች ሚስጥራዊ መዝገቦችን በእነዚህ መንገዶች አይላኩ።

በአሁኑ ጊዜ ዋና ዋና አገልግሎት ሰጪዎቻችን፦

• Telecloud እና Alet Cloud፦ በኢትዮጵያ የሚገኝ የክላውድ ማስተናገጃና መሠረተ ልማት።
• AfroMessage፦ የSMS አገልግሎት፣ ከኢትዮጵያ።
• Safaricom፦ የቴሌኮም አገልግሎት።
• Zoho፦ የድጋፍ ሥርዓትና ኢሜይል።
• ቴሌግራም፦ የድጋፍ ውይይት።

አገልግሎት ሰጪዎችን ልንጨምር ወይም ልንቀይር እንችላለን። ወቅታዊውን ዝርዝር በ info@ledger.et መጠየቅ ይችላሉ።

የሕዝብ ድረ-ገጻችን ኩኪዎችንና ተመሳሳይ ቴክኖሎጂዎችን ይጠቀማል፦

• አስፈላጊ ኩኪዎች፦ ለመግቢያ፣ ለደህንነትና ለቋንቋ ምርጫ ያስፈልጋሉ። ሁልጊዜ ይሠራሉ።
• የምርጫ ኩኪዎች፦ ምርጫዎችዎን ያስታውሳሉ።
• የትንተና ኩኪዎች፦ ድረ-ገጹን ለማሻሻል ጎብኚዎች እንዴት እንደሚጠቀሙበት ያሳዩናል።
• የማስታወቂያ ኩኪዎችና ፒክሰሎች፣ Meta Pixelን ጨምሮ፦ ማስታወቂያዎቻችንን ይለካሉ፤ በሌሎች ድረ-ገጾች ላይም ተገቢ ማስታወቂያዎችን ያሳዩዎታል። የIP አድራሻዎን፣ የብራውዘር መረጃዎንና የጎበኟቸውን ገጾች ለማስታወቂያ አቅራቢው ሊልኩ ይችላሉ፤ አቅራቢውም መረጃውን ከኢትዮጵያ ውጭ ሊያስተናግደው ይችላል።

ለመጀመሪያ ጊዜ ሲጎበኙ የሚታየው የኩኪ ማሳወቂያ አስፈላጊ ያልሆኑ ኩኪዎችን እንዲቀበሉ ወይም እንዲከለክሉ ያስችልዎታል። ምርጫዎን በማንኛውም ጊዜ ከድረ-ገጹ ግርጌ ባለው ማስፈንጠሪያ መቀየር ይችላሉ። ኩኪዎቹን መከልከል ድረ-ገጹን ከመጠቀም አያግድዎትም።

የማስታወቂያና የትንተና መሣሪያዎች በLedger ፕላትፎርም ውስጥ ፈጽሞ ጥቅም ላይ አይውሉም። TINን፣ የደረሰኝ መረጃን፣ የገዢ መረጃን ወይም የድጋፍ መልእክቶችን ለማስታወቂያ ፕላትፎርሞች ፈጽሞ አንልክም።

እንደ የደህንነት ማስጠንቀቂያዎች፣ የክፍያ ማሳሰቢያዎችና የአስፈላጊ ለውጦች ማሳወቂያዎች ያሉ የአገልግሎት መልእክቶችን እንልካለን። እነዚህ የአገልግሎቱ አካል ናቸው።

የማስተዋወቂያ መልእክቶችን የምንልከው ሕጉ ሲፈቅድ ወይም እርስዎ ሲስማሙ ብቻ ነው። እያንዳንዱ የማስተዋወቂያ ኢሜይል ከዝርዝሩ የመውጫ መንገድ አለው፤ ወይም በ info@ledger.et ይጻፉልን። ወደ Ledger የሚያስገቡትን የደንበኞች ዝርዝር ለራሳችን ማስተዋወቂያ ፈጽሞ አንጠቀምበትም።

ጥራትን ለመፈተሽ፣ አለመግባባቶችን ለመፍታትና ቡድናችንን ለማሠልጠን የድጋፍ ጥሪዎችን ልንቀዳ እንችላለን። ይህንንም በጥሪው መጀመሪያ እናሳውቅዎታለን። ጥሪው እንዲቀዳ ካልፈለጉ ይንገሩን፤ ለምሳሌ በኢሜይል በሌላ መንገድ እንረዳዎታለን።

ችግርን ለመፍታት ቡድናችን ወደ አካውንትዎ መግባት ሲያስፈልገው፣ መዳረሻው በዚያ ችግር ብቻ የተወሰነ ሲሆን ይመዘገባል።

መረጃን የምናቆየው ለሚያስፈልገው ጊዜና የኢትዮጵያ ሕግ በሚጠይቀው መጠን ብቻ ነው፦

• የግብርና የደረሰኝ መዝገቦች፦ ሕጉ ለሚጠይቀው ጊዜ፤ ይህም ተያያዥ የግብር ማስታወቂያ ከቀረበበት ቀን ጀምሮ ቢያንስ አምስት ዓመት ነው፤ የንግድ ሕጉ ረዘም ያለ ጊዜ ሲጠይቅም ለዚያ ጊዜ።
• የአካውንትና የንግድ መዝገቦች፦ ደንበኝነትዎ እስከቀጠለ ድረስ። ደንበኝነቱ ካበቃ በኋላ አስተዳዳሪዎ መረጃውን በ30 ቀናት ውስጥ ማውጣት (export) ይችላል፤ እኛም ሕጉ እንድናቆይ የሚጠይቀውን ሳይጨምር በ60 ቀናት ውስጥ እንሰርዘዋለን።
• የድጋፍ መልእክቶች፣ የጥሪ ቅጂዎችና የደህንነት መዝገቦች፦ ለዓላማቸው እስካስፈለጉ ድረስ ብቻ።
• የማስተዋወቂያ ምርጫዎች፦ ዳግም እንዳናገኝዎ የመውጫ ጥያቄዎን አጭር መዝገብ እናቆያለን።

ምትክ ቅጂዎች (backups) በየተወሰነ ዑደት በራስ-ሰር ይሰረዛሉ። ከአገልግሎቱ የተሰረዘ መረጃ ያ ዑደት ሲያልቅ ከምትክ ቅጂዎችም ይጠፋል።

መረጃዎን ለመጠበቅ ቴክኒካዊና ድርጅታዊ እርምጃዎችን እንወስዳለን፤ ከእነዚህም የመዳረሻ ቁጥጥር፣ የእያንዳንዱን ደንበኛ መረጃ ለይቶ ማስቀመጥ፣ አስፈላጊ በሆነበት ምስጠራ (encryption)፣ የማረጋገጫዎች ደህንነቱ የተጠበቀ አያያዝ፣ ክትትልና ምትክ ቅጂዎች ይገኙበታል።

ምንም ዓይነት የኦንላይን አገልግሎት ከስጋት ሙሉ በሙሉ ነጻ አይደለም። መሣሪያዎችዎንና የይለፍ ቃሎችዎን ይጠብቁ፣ ለተጠቃሚዎች የሚያስፈልጋቸውን መዳረሻ ብቻ ይስጡ፣ ችግር ከጠረጠሩም ወዲያውኑ በ info@ledger.et ያሳውቁን።

የደህንነት ችግር የግል መረጃን ቢነካ፣ ችግሩን ለመቆጣጠር በፍጥነት እንሠራለን፤ የተጎዱ ደንበኞችን ሳንዘገይ እናሳውቃለን፤ ሕጉ ሲጠይቅም ለባለሥልጣኑ እናሳውቃለን።

በኢትዮጵያ ሕግ መሠረት የሚከተሉት መብቶች ሊኖሩዎት ይችላሉ፦

• ስለ እርስዎ ምን መረጃ እንዳለን የማወቅና ቅጂውን የማግኘት፤
• የተሳሳተ መረጃ የማስተካከል፤
• መረጃው እንዲሰረዝ ወይም አጠቃቀሙ እንዲገደብ የመጠየቅ፤
• ቀጥተኛ ማስተዋወቂያን ጨምሮ በአንዳንድ አጠቃቀሞች ላይ የመቃወም፤
• ፈቃድዎን በማንኛውም ጊዜ የማንሳት፤
• መረጃዎን ሊጠቀሙበት በሚችሉበት ቅርጽ የማግኘት።

እነዚህን መብቶች ለመጠቀም በ info@ledger.et ይጻፉልን። ማንነትዎን እንዲያረጋግጡ ልንጠይቅዎ እንችላለን። በ30 ቀናት ውስጥ፣ ሕጉ አጭር ጊዜ ከጠየቀም ከዚያ ቀድመን እንመልሳለን፤ ጥያቄዎን ለመፈጸም የሚከለክል ሕጋዊ ምክንያት ካለም እናብራራለን። ጥያቄዎች ከክፍያ ነጻ ናቸው።

መረጃዎ በሌላ ንግድ ድርጅት መዝገብ ውስጥ ከሆነ፣ ለምሳሌ የዚያ ድርጅት ደንበኛ ስለሆኑ፣ በመጀመሪያ ያንን ድርጅት ያነጋግሩ። እኛም እንዲመልሱልዎ እናግዛቸዋለን።

የተመዘገበ ደረሰኝ በግል መረጃ ጥያቄ አይቀየርም። የሚስተካከለው በክሬዲት ኖት ወይም በዴቢት ኖት ነው።

Ledger ግብሮችን በራስ-ሰር ያሰላል፣ የደረሰኝ መረጃን ይፈትሻል፣ የደህንነት ፍተሻዎችንም ያካሂዳል። እነዚህ ሂደቶች በእርስዎ ላይ ሕጋዊ ውጤት ያለው ውሳኔ አይወስኑም። እርስዎንም ሆነ ንግድዎን ሊለዩ የማይችሉ ስም-አልባ ስታቲስቲኮችን Ledgerን ለማሻሻል ልንጠቀም እንችላለን።

Ledger ለንግድ ድርጅቶች የሚቀርብ አገልግሎት ነው። ለልጆች የታሰበ አይደለም።

ቅሬታ ካለዎት እንድንፈታው በመጀመሪያ በ info@ledger.et ያነጋግሩን። በኢትዮጵያ የግል መረጃ ጥበቃን ለሚቆጣጠረው የኢትዮጵያ ኮሙኒኬሽን ባለሥልጣን (www.eca.et) ቅሬታ የማቅረብ መብትም አለዎት።

ይህንን ፖሊሲ ልናሻሽለው እንችላለን። እያንዳንዱ ስሪት ቀኑን ያሳያል፤ አስፈላጊ ለውጦችንም ከመጽናታቸው በፊት በኢሜይል ወይም በፕላትፎርሙ እናሳውቅዎታለን።

ይህ ፖሊሲ በእንግሊዝኛና በአማርኛ ቀርቧል። በሁለቱ ቅጂዎች መካከል ልዩነት ቢኖር የእንግሊዝኛው ቅጂ ተፈጻሚ ይሆናል።